السبت، 21 يونيو، 2014

ريفيو: ظلال كريميه من Givenchy ombre couture :

اليوم الريفيو عن ظلال عيون كريميه جديده من جيفنشي لفتت نظرى بالصدفه وهى من المنتجات الجديده فى استاند جيفنشي 






تفاصيل المنتج :
الشركه بتسوق للمنتج على انه ايشادو كريمى الملمس يدوم 16 ساعه .
سعره 120 ريال .
متوفر بسيفورا و وجوه ........
متوفر منه حوالى 10 درجات .
حجمه 4 جم.

التغليف :
- جيفنشي من الماركات الفخمه و ده بينعكس على التغليف طبعا الشادوهات العلبه بلاستيك عالى الجوده صعب الكسر و شفاف و ده جميل عشان سهل انى اشوف اللون بدون ما افتحه و ليها غطا اسود محكم الغلق عليه علامه جيفنشى المعروفه .
- حبيت التغليف من حيث الشكل و الجوده مريحه فى الاستخدام .

الملمس :
- من الحاجات الى خلتنى اشترى المنتج ده لما كنت بجربه فى المحل توقعت انه يكون كريمى عادى زى ماك بينت بوت مثلا او مايبلين تاتو لكن ملمسه كان مختلف تماما 
يشبه ملمس الغيوم اخف بكتير من ملمس دريم موس بلاشر من مايبلين و اخف بكتيرمن اى كريم شادو جربته قبل كده .
- خفيف جدا على جفن العين كانه مش موجود اصلا ( اقصد الملمس مش قوه اللون) .


 الاستخدام :
- اشتريت منه درجتين عشان اقدر اطلع منهم لوك كامل للعيون أمد بالاصابع  اللون الروز الفاتح على كامل الجفن واستخدم فرشاه كسره الجفن مع اللون الغامق و ادمجه بطريقه خفيفه .
- سهل الدمج و التوزيع سواء بالاصابع او بالفرشاه روعه مش محتاج اى احتراف بيندمج باقل لمسه و فى نفس الوقت اللون قوى و واضح.
- بيقلل كتير من شكل الخطوط على الجفن .
- ثابت جدا مع استخدام برايمر او بدون اى اساس تحته مناسب جدا لايام الحر .

الدرجات:
المنتج جديد و انا شخصيا مسمعتش عنه قبل ما اشتريه اى معلومات و فى لعاده لما اجرب منتج جديد بشترى منه واحد بس كتجربه لكن من جمال الدرجات مقدرتش اقاوم جمالها و اخدت الاتنين و مندمتش ابدا.
- الدرجات كلها بتتميز ان الوانها مختلفه عن الماركات التانيه يعنى اللون مش صريح لأ اللون ليه اندر تون بيخلى الدرجه غنيه و تليق على اى بشره و كمان تليق على اى لون عيون و لون ايلاينر و من جمال الدرجات ممكن اشتخدامه حتى بدون ايلاينر مش بيصغر العين ولا بيخليها تبان مرهقه .
- متوفر منه حواللى عشر درجات ما بين الغامق و لفاتح و المطفى و اللامع .
- الدرجتين الى جربتهم رقم 10 و رقم 3  الاتنين مطفى .
- الدرجات اللامعه فيها قطع جليتر صغيره جدا مش بتاثر ابدا على طريقه مد الظلال على الجفون.






-rose illusion10 :
 لونه روز فاتح محايد مش محمر بدا و ده بخليه يقلل من ظهور الارهاق على العين .



-rose dentelle3:
لونه خليط ما بين البنى الهادى و الروز الغمق و البنفسجى الوسط يصعب وصفه اتمنى الصور تشرح قصدى اكتر .


الخلاصه :
من اكتر منتجات العيون الى حبيتها الفتره الاخيره و اكيد هحاول انى اكمل باقى المجموعه من الالوان التانيه .
تقيمى له اكتر من عشره على عشره فى كل شئ الدرجات و الثبات و الدمج و التغليف .
يستاهل سعره و اكتر كمان .
باختصار حبيته و انصح المهتمين بالمنتجات التجميل روحى اى استاند جيفنشى و مررى اصابعك عليه و احكمى بنفسك .


* المنتجات دى اشتريتها بمالى الخاص مش الشركه هيا الى ارسلتها ليا و لا دفعتلى فلوس باى شكل من الاشكال مقابل الريفيو ده راى الصريح فى المنتج و اى ريفيو فى المدونه بيكون رائى الشخصي بامانه .

شكرا لمتابعتكم المدونه هتلاقونى كمان على الانستجرام و الفيس بوك و التويتر .

ليست هناك تعليقات:

إرسال تعليق

للاعلان على المدونه

للاعلان على المدونه