الخميس، 30 أبريل 2015

مجموعه the body shop زبده الكاكاو:

السلام عليكم يا بنات  النهارده هكتب لكم عن تجربتى مع مجموعه زبده الكاكاو من بودى شوب 
الى خلانى اختار المجموعه دى انى كل لما اسال اى حد فى بودى شوب عن افضل شئ لترطيب قوى ينصحنى بيها و طبعا كان لازم اجربها .
حبيت اجرب المجموعه كلها عشان اقدر احكم عليها .
المجموعات غالبا بيكون عليها خصم معظم الاوقات وفى الحقيقه انا من محبي الخصومات و دى كان عليها خصم 20%.
تتكون من زبده 200مل و سكرب  200 مل و شاور كريم 250 مل و لوفه صغيره و 2 جوانتى تقشير.

التغليف:

تغليف الخارجى ممتاز و شيك ينفع هديه فعلا و الصندوق لونه مناسب و حلو و استخدمته بعد لما خلصت .
بالنسبه للزبده و السكرب نفس العلبه العاديه و معنديش تعليق عليها كويسه و مريحه فى الاستخدام و شكلها جميل .
الشاور كريم وده محبتش علبته خالص لانه قوامه سميك جدا و ينزل ببطء من العلبه و المشكله اكتر لان العلبه صلبه مش ممكن تضغطى عليها عشان تسرعى نزولها و كانت النتيجه انى فتحت الغطا الشفاف و ده خلى استخدامه اسهل شويه .





1- الشاور كريم :
قوامه سميك و لونه اصفر كنت خايفه ان ريحته تطلع سخيفه لكن بصراحه طلعت ريحته جميله جدا و هاديه بس مش معطره اوى كمان مش بتثبت مجرد ما تخلصي استحمام تكون الريحه مش موجوده خالص .
بستخدمه اما مع اللوفه او مع جوانتى التقشير فى الحالتين نتيجته ممتازه مرطب جدا و بيخلى البشره ناعمه وفى نفس الوقت مش مزيت ولا يدهن و العبوه كميتها كبيره و فى الاستخدام مش بتحتاج كتير .
حبيه جدا و اصبح من مفضلاتى و اكيد هرجع اشتريه تانى .



2- زبده الجسم بزبده الكاكاو:
الزبده نفسها مش  خام لأ هى من ضمن مكوناتها زبده الكاكاو لونها بيج فاتح قوامها سميك و لكن ناعم و سهل الاستخدام بمجرد ما تلمسيه بيدوب شويه زى الزبده فعلا قوامه اسمك شويه من انواع الزبده الى جربتها قبل كده من بودى شوب و دى حاجه حبيتها مش مزعجه بالنسبه ليا .
مرطبه جدا و ترطيبها بيفضل اكتر من يوم ممتازه للبشره الجافه عيبها الوحيد انى محبتش ريحتها خالص .



3- مقشر الجسم بزبده الكاكاو :
المنتج المفضل بالنسبه ليا فى المجموعه كلها مرطب جدا و فى نفس الوقت مقشر قوى .
قوامه سميك و الحبيبات قويه و الافضل انها مش بتدوب مع المايه او على الجسم بالعكس بخليكى تتحكمى فى مده التقشير الى انتى محتاجاها .
نتيجتها ممتازه والاهم انها مش بتخلى البشره جافه بعد الاستخدام .
انصح بيها و اكيد هشترها تانى .

- الوفه و جولنتى التقشير اكيد مش محتاج اتكلم عنهم اللوفه عاديه جدا مفيهاش جديد و الجوانتى من احسن الانواع الى جربتها و فرق الجوده كبير عن الانواع الرخيصه .


- الخلاصه :
بشكل عام المجموعه تستحق الشراء فعلا و اكيد اكيد هرجع اشتريها تانى بعد لما اجرب مجموعه الارجان الاول .

هناك تعليق واحد:

Maria يقول...

تجربه موفقه

إرسال تعليق

للاعلان على المدونه

للاعلان على المدونه